Ya Aytan Mag-Indi, gisa silan katutubu ya manugêl sa bung-uy un Porac buy Floridablanca, Pampanga. Si bêg sa sabi la, Mag-Indi. Ya Aytan Mag-Indi paubat pun awlagi, maniwala silan dilag Dios ya lagyun pamêg la sa Dios, Namalyari. Maniwala sila êt ta si kaganawan bagay baydi sa babun luta, kay ubat ngan sa Namalyari. Kabay nu mamupul sila sa kaganawan gitna la, dilag silan kaugalyan na sêpat lan pandaygên. Si pamêg baydu, pamadêp kan Bapan Namalyari. Pandaygên lay abitu bilang pagpasalamat buy panggalang la sa Namalyari. Si kabyayan la, manggitna, manuliptêt, buy manaysay silan magmikakalasi ya ayup.
